сутектік оқ-дәрі

(Термоядерный (водородный) боеприпас)

термоядролық зарядты ракетаның немесе авиациялық бомбаның жойғыш бөлігі. Т.(с.).о-д. төмендегі негізгі элементтерден: термоядролық зарядтан, 239-плутоний (немесе 235-уран) зарядынан, 238-урандық қабықшадан, жарғыш құрылғыдан және ракета (бомба) корпусынан тұрады. Т.(с).о-д. жарылысы миллиондаған градуспен өлшенетін өте жоғары температурада өтетін жеңіл элементтер ядроларының қосылыс (синтез) реакциясына негізделген. Термоядролық оқ-дәрінің құрама бөлігі болып табылатын плутоний немесе уран зарядының (атом бомбасының) жарылысы термоядролық реакцияның басталуына қажет өте жоғары температура көзі болып келеді. Осы зарядтың жарылысынан кейін аса жоғары температура (10 млн градустан жоғары) пайда болады, соның әсерінен термоядролық реакция температураны 30—40 млн градусқа көтере отырып, жарылыс сипатына ие болады. Синтездің ядролық реакциясы кезінде 238 уран қабықшасы ядроларының бөлінуін тудыратын өте жоғары жылдамдықты нейтрондардың көп мөлшері бөлініп шығады. Мұндай оқ-дәрілердің қуаты тасығыш-ұшақтың жүк көтергіштігімен немесе ракетаның ұрыстық бөлігінің шектеулі салмағымен анықталады.